نبض مخفي
بقلم/نشأت البسيوني
كل انسان يحمل جواه نبض محدش يعرف عنه حاجة نبض بيهتز كل ما الروح تتعب وكل ما القلب يحاول يثبت لنفسه أنه لسه قادر يكمل ورغم أننا بنبان أقوياء قدام العالم إلا أن جوانا حكايات طويلة محدش شاف تفاصيلها غيرنا
أوقات نحس إن الكلام تقيل وإن الشرح مرهق وإن الصمت هو الملجأ الوحيد اللي يحمينا من سوء الفهم ومن الأحكام الجاهزة اللي الناس بتحطها قبل ما تسمعنا نصمت لأننا تعبنا من تبرير اللي مش محتاج تبرير وتجاهل اللي مش محتاج تفسير
جوه كل واحد لحظة انكسار محدش كان معاه فيها ولحظة انتصار كان يتمنى يلاقي حد يشاركه فرحها وجوه كل واحد وجع قديم مابيبوحش بيه علشان ما يبانش ضعيف وحلم جديد خايف يقوله علشان ما يتسخرش منه لكن رغم كل ده النبض بيكمل
أحيانا نحس إن الدنيا أوسع من طاقتنا وأقرب من اللي نتخيله وألطف من اللي نستحقه وأقسى من اللي نتحمله وكل ده يحصل في نفس اليوم في نفس القلب في نفس العقل عشان كده بنحتاج لحظة نوقف ونسمع النبض المخفي جوا صدورنا لحظة نفهم فيها احنا رايحين فين وليه
ومع مرور الوقت نكتشف أن سر قوتنا مش في إننا ما نتعبش ولا ننكسر سر قوتنا في إننا نرجع نقوم كل مرة وكأننا أول مرة نحاول سر قوتنا في إننا نصدق أحلامنا حتى لما تبان بعيدة ونصدق نفسنا حتى لما نكون احنا بس اللي شايفين الصورة كاملة
النبض المخفي هو الحقيقة الوحيدة اللي ما بتكذبش هو اللي يعرف قد ايه تحملنا وقد ايه وقفنا رغم كل حاجة وقد ايه احنا لسه قادرين نعيش ونحب ونتغير مهما حصل مهما حدفنا الزمن في طرق مش من اختيارنا
يفضل النبض ده شاهد على كل لحظة عدت وكل معركة خضناها بصمت وكل أمل مسكنا فيه لحد ما بقى جزء مننا النبض المخفي هو اللي بيكمل الطريق لما كل حاجة توقف هو اللي يقول لنا ان لسه في بكرة يستنى خطوتنا مهما كانت بطيئة
نبض مخفي
بقلم/نشأت البسيوني
