لما تفهم ان مش كل حرب لازم تخوضها
بقلم/نشأت البسيوني
مع الوقت الانسان بيكتشف ان في معارك كتير خاضها وهو مش محتاج يدخلها من البداية خاض نقاشات ما كانتش تستاهل دقيقة من عمره ودافع عن نفسه قدام ناس عمرهم ما كانوا هيسمعوه واتخانق علشان يثبت حق ما كانش هيضيع اصلا واتعلق بحاجات كان المفروض يسيبها من بدري
وتبدأ تفهم ان في حرب بتسرق طاقتك
وحرب بتسرق وقتك
وحرب بتسرق هدوءك
وان اعظم انتصار ممكن تحققه هو انك تمشي وتسيب الضوضاء وراك
ولما تستوعب ده
تلاقي نفسك ما بقتش ترد على كل كلمة
ولا تدخل كل نقاش
ولا تزعل من كل تصرف
ولا تسيب يومك يتبهدل بسبب حد تافه او موقف عابر
وتتعلم ان الصمت مش ضعف
وان التجاهل مش هروب
وان الانسحاب مش خسارة
الانسحاب ساعات بيكون ذكاء
وبيحافظ على روحك قبل ما يتكسر فيها حاجة
وتبدأ تختار معاركك
وتفكر قبل ما تدخل اي حرب
هل هتزودني ولا هتنقصني
هل هتعليني ولا هتوجعني
هل هستفيد ولا هطلع منها منهك
وتدرك ان اللي يستاهل طاقتك
هو اللي يقدرك
واللي يستاهل وقتك
هو اللي يحافظ عليه
واللي يستاهل حربك
هو اللي ما يرضاش يشوفك بتخسر
وتلاقي نفسك اقوى
واهدا
ووعيك اعمق
وحياتك ابسط
لانك اخيرا فهمت ان مش كل حرب لازم تخوضها
وان السلام اللي جواك
اهم من اي انتصار برا
