الملابس التي تتذكر ما ننساه
بقلم/مرينا حسن
في عالم الموضه في سر محدش بياخد باله منه سر بيخلي قطعة هدوم صغيرة تحفظ اللي الشخص نسيه وتفتكر اللي هو حاول يهرب منه لأن القماش مش بس بيتلبس لكن بيشيل أثر يوم وأثر صوت وأثر خطوة حتى لو احنا مش شايفينه الموضه هنا ما بتبدأش بخيط ولا لون بتبدأ بمشهد داخلي بيتكرر جوه الإنسان من غير ما يحس المشهد اللي يختار فيه قطعة معينة مش عشان شكلها لكن عشان إحساس معين لسه واقف جواه ومش عايز يمشي
الهدوم بتفهمنا بطريقة غريبة كأنها بتسمع نبضنا قبل ما نلبسها فيه قطعة تهدي الروح من أول لمسة وفيه قطعة ترفع النفسية من غير ما نعرف السبب وفيه قطعة تدي إحساس حماية وكأنها درع ناعم بيسندنا من غير ما يتكلم ومع الوقت الإنسان يفتكر الأحداث من خلال الملابس مش من خلال الصور يفكر في اليوم اللي كان فيه قوي بسبب جاكيت معين أو اليوم اللي كان فيه تايه بسبب لون معين أو اليوم اللي حس فيه إنه اتولد من جديد لأنه لبس حاجة شبه روحه مش شبه حد تاني
الملابس مش بتغير شكل الإنسان بس لكنها بتغير طريقته في الوجود بتغير حضوره قدام العالم بتغير صمته وكلمته وخطوته لأن اللي يلبس حاجة شبهه هيمشي مطمن واللي يلبس حاجة بتخونه هيمشي مرتبك مهما حاول يخبي مرتبك في نظرته في كتفه في طريقته وهو بيحرك إيده لأن الموضه مش خارج بس لكنها داخل قبل ما تكون شكل
ولأن العالم بقى أسرع من نفس الإنسان بقت الموضه هي الطريقة اللي نلحق بيها نفسنا فيها هي اللحظة اللي نقف فيها قدام المراية ونقرر نرجع نعيد تعريف نفسنا في ثانية واحدة نغير فيها اللي الأيام عجنته جوا قلوبنا فتيجي قطعة بسيطة تقول كل اللي احنا مش قادرين نقوله تيجي خامة ناعمة تطبطب على تعب قديم وتيجي قصة جديدة تشيل شوية خوف من على الصدر وتخلي النفس يدخل براحة أكتر
وفي زمن بقى مليان صور ومقارنات بقت الموضه هي المساحة اللي تقول فيها أنا مش نسخة من حد أنا نسخة واحدة مش هتتكرر حتى لو لبست أبسط حاجة حتى لو كان شكلها عادي اللي يخليها مميزة هو اللي لابسها مش اللي صممها لأن الحضور اللي جاي من جوا أقوى دايما من أي علامة أو أي ماركة أو أي صيحة كل الصيحات بتنتهي لكن إحساس الشخص بنفسه عمره ما بينتهي
واللي محدش بيشوفه إن كل واحد فينا عنده قطعة هدوم هي الأقرب لقلبه مش لأنها غالية مش لأنها مشهورة لكن لأنها بتنتمي لحظة مهمة لحظة فرح لحظة قوة لحظة قرار لحظة بداية وهنا بس نفهم إن الموضه مش عن الملابس اللي نشتريها لكن عن الذكريات اللي نعيشها جواها عن الحكايات اللي القماش يحتفظ بيها من غير ما يفضحنا ومن غير ما ينسى
الموضه مش ألوان ولا تشكيلات الموضه صوت هادي جاي من القماش يكلم الإنسان اللي لابسه ويقوله أنا فاكر قوتك وأنا شايل ضعفك وأنا شاهد على يومك وأنا معاك في خطوتك الجايه الموضه رغبة في إن الإنسان يشوف نفسه بصورة تناسب قلبه قبل ما تناسب عيون الناس وكل قطعة تختارها هي جزء من سيرة حياتك حتى لو كانت بسيطة لأنها في الآخر مش مجرد لبس لكنها جزء منك بيتحرك معاك في كل خطوة
